أحمد حسن يفتح النار على رضا عبد العال

شن أحمد حسن نجم الكرة المصرية السابق، هجومًا لاذعًا على رضا عبدالعال نجم النادي الأهلي السابق، بعد تصريحات الأخير ضد عميد لاعبي العالم.

وقال أحمد حسن خلال تصريحاته في برنامج «سابع سما» على شاشة النهار: «رضا عبدالعال قال على عمر مرموش لا يملك أي إمكانيات ولا يصلح للمنتخب وبيجي المنتخب مجاملة وأحمد مدبولي أحسن منه».اضافة اعلان

وأضاف الصقر أحمد حسن: «بعد ما مرموش كسر الدنيا، كان من الطبيعي إنه يغير تصريحاته، ولكن رضا عبدالعال صمم وقال إنه مرموش سجل 3 أهداف في فرقة صغيرة».

وأكمل: «أنا رديت على رضا عبدالعال وقولت إن مرموش لعيب مصري ومحتاج تدعيم وتشجيع وعدم إهانة الولد وتقول إنه بيتشقلب».

وواصل أحمد حسن: «بعدها رضا عبدالعال اتريق عليا برة الكورة لإني في حته تانية في الكورة، وقال إني بنص لسان واتريق على اللدغة بتاعتي، ومجاش من الناحية الفنية».

وزاد: «رضا عبدالعال اتريق على إبراهيم عبدالجواد وقال إنه بيحط كحل، ومش بيتكلم فني أو طريقة الكورة، وأنا بالنسباله فوق التقييم ميقدرش يقيمني عشان أنا بعيد».

ووجه أحمد حسن نصيحة لـ رضا عبدالعال، قائلًا: «أنا كنت بحترمه كلعيب كورة، ولكن بقوله دلوقتي ياريت تتكلم في الكورة والفنيات فقط، وبلاش تروح لحته في مهانه عشان اللعيبة دي عندها أسرة وأولاد».

وأتم عميد لاعبي العالم قائلًا: «بالنسبة لموضوع نص لسان أنا عن نفسي اللدغة دي بحبها، ومش مضيقاني نهائي الناس كمان اللي حوليا بتحبها، وبعدين أنا عند حرف واحد بس».