علق خالد الغندور نجم الزمالك ومنتخب مصر السابق، على تصريحات محمود عبدالرازق شيكابالا، قائد الأبيض السابق، والتي آثارت جدًا واسعًا خلال الساعات الماضية بين جماهير القلعة البيضاء.
اضافة اعلان
وقال الغندور في تصريحات خلال فيديو عبر حسابه الرسمي على «فيس بوك»: «لما اتفرجت على حلقة شيكابالا، لقيت زمالكاوية كتير زعلانين وأهلاوية بيتكلموا عن تصريحاته بإنه كان نفسه يأخد بطولة دوري أبطال أفريقيا، ولكن مخدهاش بسبب إنهم كانوا 14 لاعب، وإنه دخل على اتنين لاعيبة لاقاهم بيشربوا شيشة فالدنيا اتقلبت وناس كتير اتكلمت على الموضوع ده».
أضاف: «أنا عاوز أسال سؤال هل الشيشة دي كانت معاهم هناك في جوهانسبرج، ولا هنا في مصر؟، ولو هناك هل هم خدوا عدة الشيشة معاهم بقى، من فحم ومعسل، وفي نفس الوقت لو كان في مصر هل هو دخل عليهم في الفندق يعني، وكانوا واخدين الحاجات دي في شنطة اللبس».
وتابع: «طب هل ده ممكن يكون سبب خسارة أي بطولة، وهل لاعيبة مصر منذ قبيل الأزل مش بيشربوا سجائر، مفيش حد بيشرب علبة يعني، ده طلع في نفس البرنامج بركات وسيد معوض وقعدوا يهزروا وسيد معوض قال إن بركات قاله روح هات سجائر من الكشك فالإسماعيلية كلها فكرت إن سيد معوض بيشرب سجائر».
وواصل: «ده في لاعيبة بتشرب سجائر وشيشة من أيامي ومن أيام جيل كابتن حسن شحاته، ودلوقتي وبنسمع أكتر من كده».
وأتم: «تصريح خد أكتر من حقه وعلى مستوى العالم في لاعيبة عالمية بتروح تسكر وتشرب، وده تصريح مش شايف إنه السبب في خسارة البطولة ولكن التركيز بيبقى شيء مهم قبل أي بطولة».
وكان شيكابالا خرج بتصريحات مدوية عبر قناة «إم بي سي مصر2»، قال خلالها: «كنا في نهائي أفريقيا ده 14 لاعيب، وكان في اثنين لاعيبة أدخل عليهم ألاقيهم بيشيشوا في الأوضة، هل يعقل ده؟!، وكنا بنقول في حاجات غلط».
