علق أحمد شوبير حارس مرمى الأهلي ومنتخب مصر السابق على الظهور السيء للنادي الأهلي في المباريات مع المدرب المغربي الحسين عموتة وأخرها التعادل مع المقاولون العرب 1-1.
اضافة اعلان
وقال أحمد شوبير: "في ناس كتير بتتكلم على التغيير وبيرددوا تغيير تغيير، أنا هقول لك التغيير عمل أيه مع الأهلي والاستقرار عمل أيه الأهلي".
وأوضح شوبير: "مع مانويل جوزيه الأهلي أول سنة خسر دوري ومشي وبعدين قعد شوية ومشي ورجع تاني وعمل الفترة العظيمة بتاعته وخلال فترة ولايته خسر مباريات في الدوري وفي أفريقيا عادي جدا لكن لما كان فيه استقرار عمل كل حاجة في كرة القدم، ثم مع رحيل جوزيه حصل حتة القلق ومرة برتغالي ومرة لاسارتي ومرة مين ومرة مين، والفترة الاخيرة في الدوري فيه مدربين كثير، ومرة الأهلي غير 3 مدربين في سنة واحدة وبعدها جت فترة استقرار مع موسيماني وكان فيه فترة قصيرة جيدة مع فايلر، وبعدها جت فترة رائعة مع كولر خد 12 بطولة في سنتين".
وتابع شوبير: "بعد ما مشي كولر قعدت تتخبط مرة ريبيرو، وبعدها عماد النحاس ثم توروب، لحد ما وصلت للحسين عموتة مدرب عنده سي في كويس جدا واسم كبير مع منتخب المغرب للمحليين ومنتخب الأردن ومع السد القطري ومع الوداد واخد بطولة افريقيا، وجماهير الأهلي استبشرت معاه خيرا، لكن في مباراة برشلونة الأداء لم يرض الناس ومبارياته في الدوري الأداء لم يلق قبول الجماهير رغم الانتصار في أول 3 مباريات على الشرقية إنبي وزد وسموحة، وبعدين لعب مباراة المقاولون واتعادل 1-1 مع أداء سيء جدا جدا والأهلي كان مغلوب واحد بهدف من ركلة جزاء صحيحة".
وأوضح: "وأوعى حد يقولي إن الحكم محمود بسيوني سبب التعادل ولا خسارة نقطتين، وكويس إني مشوفتش حد بيتكلم على الحكم، وأنا مش بحب شغل المظلومية ده لا مع الأهلي ولا غيره، أنت العب يا باشا وشد حيلك والحكم ليس عليه أي شيء بغض النظر عن المطالبات بطرد دوكو دودو ووجهة نظري إن الانذار الأول كان متفعجل فيه".
وأضاف شوبير: "لكن اللي عايز أقوله إن فيه تيار جارف للتغيير مينفعش خالص أنت كل كام ماتش هنمشي مدرب، لازم يكون في تروي وهدوء، وهو أنت هتغير كل 5 ماتشات مدرب؟! ما أنت عملت كده مع ريبيرو وعلى فكرة الأهلي مع ريبيرو قدم في كأس العالم للأندية أداء رائع جدا وكان ممكن يتأهل ويعمل إنجاز كبير لكن بعد ما رجعل من المونديال حقق نتائج سيئة فمشي ومحدش زعل عليه، وبعد كده جاء توروب وحصل لخبطة كبيرة في الأهلي".
واختتم شوبير: "فمش كل 5 ماتشات هنمشي مدرب مينفعش، لكن ميمنعش أنك تقعد مع المدرب وتكلمه، جميل أنك تدي المدرب الصلاحيات الفنية كلها، لكن الأجمل أنك تقعد معاه وتقول له فيه أيه..؟! تشوف القصة إيه..؟، لازم يكون في تواصل وحساب بين المسؤولين والمدرب أول بأول ويشوفوا الأمور عاملة إزاي يعني".
