علق الإعلامي أحمد شوبير، على وفاة أحمد رفعت لاعب مودرن سبورت ومنتخب مصر، الذي وافته المنية عن عمر ناهز 31 عامًا، متأثرا بتعرضه لأزمة قلبية خلال مباراة فريقه أمام الاتحاد السكندري، يوم 11 مارس الماضي، ضمن منافسات دوري NILE.
اضافة اعلان
وقال «شوبير» في برنامجه «مع شوبير»، المُذاع عبر «أون سبورت إف إم»: «مصر كلها كانت في صدمة بعد خبر وفاة أحمد رفعت.. رفعت - الله يرحمه - بني آدم في غاية الطيبة والحرفنة، واتكلمت معاه قبل كده كذا مرة إنه هيكون واحد من أهم المواهب الكروية».
أضاف: «رحت زرت أحمد رفعت لما اتنقل إلى المستشفى هنا في القاهرة، أنا ومصطفى شوبير، مع إني مبحبش أقول الحاجات دي وفضلت أهزر مع والدته ومصطفى شوبير اتكلم مع رفعت شوية بس مكانش لسه في كامل الوعي واتطمنا إن الدنيا تمام، والناس كلها كانت تفاءلت خلاص».
وتابع: «أوقات ربنا بيبعت شخص في العيلة عشان يغير الشكل وينقلهم نقلة تانية ويسهم معاهم.. أسرة رفعت ناس طيبين جدا من كفر الشيخ.. سافرت يومين إجازة أنا وعيلتي فبنسهر شوية كده فلاقيت مصطفى بيهمس لوالدته الفجر وبيقولها متقوليلوش بقى دلوقتي، فحسيت بيه وسألته لاقيته بيقولي إن أحمد رفعت في ذمة الله».
أضاف: «عندي اقتراح من أحد اللاعيبة بخصوص أحمد رفعت الله يرحمه، وهو إن الأندية الكبيرة أهلي وزمالك وبيراميدز يطلعوا مثلا 10% من رواتب اللاعيبة ويتحط وديعة للاعب ووالدته، أو اللي هم يطالبوا بيه».
وتابع: «نادي مودرن سبورت ورئيسه الدكتور وليد دعبس لم يتركوا أحمد رفعت لحظة واحدة، وبناشد وزير الشباب والرياضة ورئيس اتحاد الكرة إنهم يعملوا لجنة طبية لكل لاعبي الأندية عشان موضوع أحمد رفعت ده ميتكررش تاني، أرجوكم».
واختتم: «لازم يتفتح تحقيق في قصة أحمد رفعت، ولو له حقه ياخده والغلطان يتحاسب».
