وجه الإعلامي أحمد شوبير حارس مرمى الأهلي ومنتخب مصر السابق رسالة نارية إلى منتقدي عودة حسام عاشور إلى النادي الأهلي ودخوله النادي منذ يومين ولقائه مع بعض لاعبي الأهلي.
اضافة اعلان
وقال أحمد شوبير في تصريحات إذاعية: «حسام عاشور من يومين دخل النادي الأهلي، الدنيا اتقلبت على السوشيال ميديا، ناس تقول نعفو عنه وناس قالت لأ.. لأ إيه يا عن أنت وهو، حسام عاشور ده أسطورة ده أكثر واحد في التاريخ حقق بطولات مع النادي الأهلي وكابتن تاريخي للنادي الأهلي».
وتابع شوبير: «يقول لك أصله غلط طب ما يغلط هو احنا ربنا، المولى عز وجل هو اللي بيسامح وبعدين أيه الغلط اللي عمله يعني طلع قال كلمتين، ما كلنا بنطلع نقول كلمتين ماشي عادي، وبنغلط كلنا بنبقى متعصبين ونقول كلمتينن لكن عاشور لا تطاول على حد ولا غلط في حد».
وواصل حارس الأهلي السابق: «واحد تاني يقول لك أصله لعب في نادي تاني، وأيه المشكلة أتخن لاعبي الأهلي وبيشتغلوا دلوقتي في الأهلي لعبوا في أندية بره، النادي مشاهم ولعبوا بره، أنا مبهزرش أنت ايه اللي مزعلك إنه لعب بره النادي قال له شكرا جزيلًا طبيعي يروح يلعب».
وأوضح شوبير: «لكن حسام عاشور مجاش اتشرط على الأهلي هو كان عايز يكمل والنادي قال بطل وهنعمل لك مهرجان اعتزل، واستنى الرد لكن النادي اتأخر شويه قام طلع قال كلمتين في فيديو مكانش يليق به ككابتن النادي الأهلي وانتهت الحدوتة عند هذا الحد».
وانتقد شوبير المطالبين بمنعه من دخول الأهلي قائلًا: «لكن أنت تحرمني كواحد من أساطير الأهلي من دخول النادي، لا ده يدخل ويتعامل أحسن معاملة، واحد يقول لك اصله قابل قندوسي وخالد عبدالفتاح ما يقابل يا عم ويدخل ويقعد على الدكة وكابتن سيد عبدالحفيظ يستقبله ويطلب له شاي كمان».
وأضاف شوبير: «عصام الحضري وحسام حسن وجمال عبدالحميد من وقت قريب، بيخشوا النادي الأهلي ويلعبوا كورة مع فريق الشمس، زي برضه اللي ماسكين مجدي عبدالغني ومجدي تاريخ كبير، عاتبه على تصرفاته على تصريحاته لكن مش هنقطع رقبته».
واختتم شوبير: «أنا من أنصار إن حسام عاشور يرجع ناديه ويرجع بيته ولو حسام عنده أزمات مادية لازم الأهلي يساعده ويوجد له عمل جوه النادي كمان دي وجهة نظري واللي يزعل يزعل».
