علق الإعلامي أحمد شوبير، حارس مرمى النادي الأهلي ومنتخب مصر الأسبق، على تصريحات حسام حسن، المدير الفني للفراعنة، عقب التعادل أمام منتخب غينيا بيساو، ضمن الجولة الرابعة من التصفيات الأفريقية المؤهلة لكأس العالم 2026.
اضافة اعلان
وتحدث حسام حسن في تصريحات تليفزيونية، عقب المباراة، قائلا: «الحمد لله حققنا نتيجة إيجابية، والمهم إننا مخسرناش برا ملعبنا، احنا فين وبقينا فين.. سعيد بالجمهور وبلاعيبتي، ومبسمعش لحد ولا فارق معايا التشكيك، فيه ناس خايفين إن المنتخب ينجح، سعيد بوجودي في منتخب مصر وبمثل الناس الكويسة في الشعب المصري، وعايز أقولكوا افرحوا، فيه قلة قليلة بتوقع الناس».
وقال أحمد شوبير في برنامجه «مع شوبير»، المُذاع عبر «أون سبورت إف أم»: «عاوز أعلق على تصريحات كابتن حسام بعد ماتش غينيا بيساو، وبقوله أرجوك يا كابتن حسام بلاش التصريحات اللي من النوعية دي، أنت نجم كبير وكلنا داعمين ليك من أول يوم».
وأضاف: «مفيش مصري محترم وطني جميل بيكره نجاح منتخب مصر، و200 واحد امبارح في القناة خلال وجودي في الاستوديو لتحليل الماتش، اتنططوا لما رجعنا للماتش واتعادلنا، فالاختلاف في الرأي لا يُفسد للود قضية يا كابتن حسام».
وتابع نائب رئيس اتحاد الكرة الأسبق: «كلنا بتشعبط في أي نجاح لمنتخب مصر، الأخطاء واردة يعني مثلا لما هاني خرج ونزل إمام، وزيزو راح للظهير الأيمن الدنيا ظبطت، وكلنا أشادنا باللي حصل وراضيين بالتعادل لكن مش مبسوطين وبكل تأكيد كنا عاوزين نفوز».
وتابع حارس مرمى الأهلي الأسبق: «مهم جدا تكسب كل الماتشات اللي علي ملعبك، فمش معنى إن حد بينتقد يبقى بيهد أو مش داعم للمنتخب، لازم نتقبل الانتقادات».
