وجه الإعلامي أحمد شوبير حارس مرمى الأهلي ومنتخب مصر السابق انتقادا حادا إلى منتخب مصر المشارك في كأس العرب ومدير المنتخب أحمد حسن نجم منتخب مصر السابق، على خلفية أزمة أحمد عاطف مهاجم المنتخب وفريق زد والتي تفجرت في الساعات الماضية.
اضافة اعلان
وقال أحمد شوبير في تصريحات إذاعية اليوم الأحد: "حق الاختيار والاستبعاد حق أصيل للمنتخب لكن لما أكون طالع ومعايا لاعيب فرحان وعيلته فرحانة إنه رايح مع المنتخب قطر، وفجأة تحبطه ده اللي حصل مع أحمد عاطف".
وأوضح شوبير: "أحمد عاطف من المهاجمين المحترمين في نادي زد، ولائحة الاتحاد العربي بتقول ما ينفعش تضم لاعيب جديد للقائمة اللي سلمتها إلا لما يكون لاعيب فيها مصاب فجهاز المنتخب عشان يضموا مروان حمدي مهاجم بيراميدز، قالوا أحمد عاطف مصاب، فالولد قال لأ أنا مش مصاب قالوا لأ إحنا عارفين مصلحتك أكثر منك، ودخلنا في حدودتة وفي الاخر طلع أحمد عاطف هو اللي غلطان".
وتابع شوبير: "إللي حصل هو نوع من أنواع الظلم وحط نفسك مكان اللاعيب، أنت يا كابتن أحمد حسن مدير المنتخب حط نفسك مكان الولد لو أنت مكان أحمد عاطف هتعمل أيه الولد صعبان عليه نفسه فأنت وجعني الوجيعة الشديدة دي ومنعني أقول اه".
وأضاف شوبير ساخرًا: "أوعى حسك عيني يا ابني تقول اه، ربنا يستر ميتعملش فيه مذكرة ويتم إحالتها لهيئة التحكيم الدولية عشان الولد معملش حاجة بيقول آه بس أنت عايز تحرمني حتى أعبر عن وجعي، أنا مش مختلف مع وجهة النظر الفنية لكن اللي حصل مع أحمد عاطف مش لطيف".
