كشف كريم وليد نيدفيد لاعب نادي سيراميكا كليوباترا الحالي والأهلي السابق، عن أسباب قطع علاقته مع رمضان صبحي لاعب نادي بيراميدز، بعد رحيله عن المارد الأحمر.
اضافة اعلان
وقال كريم نيدفيد في تصريحات عبر أحد برامج «البودكاست»: «علاقتي بين رمضان وناصر ماهر مش هقول (مقطوعة) ولكن ما فيش كلام بينا في التليفون، ولكن لما بنقابل بعض بنسلم على بعض والموضوع مش معدي أكتر من كده وعلاقاتنا مش صحاب أوي ولكن مش بنكره بعض».
أضاف: «كان في علاقة بينا في قطاع الناشئين بحكم التعامل اليومي، ولكن علاقتي برمضان كانت أقوى شوية من ناصر ماهر من أيام الناشئين والمنتخبات ولحد الفريق الأول، وناصر ماهر جالنا متأخر شوية».
وتابع: «بعدها لما احترف في أوروبا، العلاقة بدأت تقل ولكن كانت كويسة طول ما إحنا بنتعامل مع بعض، ولكن لو مفيش تعامل مفيش علاقة».
وأردف: «موضوع بيراميدز كان بالنسبة لـ رمضان صبحي إنه صح وممكن ناس شايفاه غلط ولكن أي شخص بيأخد قرار مش بيعرف نتيجته غير لما يشوف ردود أفعاله وساعتها بيعرف نتيجته هي صح ولا غلط، ولكن في الأول والأخر بيبقى قرارك».
وزاد: «قرار رمضان من القرارات اللي ضايقتني جدًا في لحظتها، لأنه كان بيتعامل داخل النادي الأهلي بتقدير كويس جدًا والناس عامله له وضع كبير جدًا وهو في سن صغير، ولكن إنك تأخد قرار زي ده مكنش حلو علينا بالذات من ولاد النادي».
وواصل: «كان ممكن تأخد القرار ده قدام شوية ولكن في السن والتوقيت ده مع اللي كان مقدم من الأهلي حسيت إنه قرار مكنش منطقي جدًا».
وأشار: «لما بيراميدز أعلن ضم رمضان رسمي، ساعتها هو دخل يودعنا على جروب الواتساب، ولكن أنا مقدرتش أرد عليه لأني كنت مضايق ومكنتش بالع الموقف، لأن أنت النادي عملك أحسن حاجة وكسر حاجات كتير علشانك، حتى الشناوي أنا دخلت وقولتله بترد على أي؟».
وأتم: «رمضان كان ابن النادي ومتربي معانا ولكن في مرة واحدة قال أنا مش معاكو، فأنا من ساعتها مكلمناش بعض ولكن شوفته قريب في النادي وسلمت عليه فقط، وكل واحد بقى في حياته».
