انتقد الإعلامي خالد الغندور نجم الزمالك ومنتخب مصر السابق، إعلان تقديم المدير الفني الجديد لنادي الزمالك.
وكان الزمالك أعلن، أمس الجمعة، عن التعاقد مع البلجيكي يانيك فيريرا، لتولي منصب المدير الفني للفريق الأول لكرة القدم في الموسم المقبل.
اضافة اعلان
وقال خالد الغندور في تصريحاته»: «تقديمة المدير الفني للزمالك معجبتنيش، لأن هو مش لاعب كرة علشان تلبسه وتطلعه فارس ويرمي القوس والسهم».
وأضاف: «واللي معجبنيش أكتر وأكتر التلميحات والتلقيح، وإحنا من فترة انتقدنا إعلان إحدى شركات المحمول بإنهم جابو واحد مجنون ووراه عربية إسعاف وعليها خطين حُمر وقبلها رامز جلال برده كان عامل إعلان».
وتابع: «فكرة التلقيح والتلميح على الأندية المنافسة مبتعجبنيش خالص، وأنا هاجمت إعلان الأهلي بتاع إحدى الشركات قبل كده وقولت عيب وميصحش، فمينفعش أنت تعمل زيه وتلقح أنت كمان».
وأكمل: «فكرة القوس والسهم وإن حاجه حمرا واقعة على الأرض لا يليق وغير مسموح طالما أنت مبتحبش ده وعتابي على مجلس الزمالك بسبب الإعلان».
وشدد: «مجلس إدارة الزمالك كان مستاء من إعلان الأهلي فالمفروض أنت كمان متعملش زي الأهلي، كفاية تلقيح ومتعملش شيء يؤدي إلى الفتنة والتعصب، ومنعملش حاجه منقبلهاش على غيرنا».
وأتم: «علينا أن نحترم بعض والتنافس يكون داخل الملعب فقط وليس على السوشيال ميديا، وأنا زعلان من إعلان الزمالك زي ما زعلت من إعلان الأهلي».
