هاجم محمد نصر الدين، المخرج بالتلفزيون المصري، رضا عبد العال، نجم الزمالك والأهلي السابق، وذلك بعد تصريحات الأخير ضده عقب مباراة الأهلي ومازيمبي الكونغولي، في إياب نصف نهائي دوري أبطال أفريقيا.
اضافة اعلان
وكان رضا عبد العال، هاجم محمد نصر بسبب إعادة هدف مازيمبي في الأهلي، مشيرًا إلي أن الإعادة الخاصة بالهدف لم تظهر الزاوية الصحيحة للكرة وهو ما تسبب في إلغاء الهدف.
وكتب محمد نصر، عبر صفحته على موقع التواصل الاجتماعي "فيس بوك": "أولاً مبروك لنادى الزمالك التأهل للنهائى وعقبال البطولة وكمان مبروك الأهلي بطل كأس الكرة الطائرة ويستمر الأهلي ملوك الصالات بجدارة، ثانيًا وده الأهم الكابتن رضا عبد العال هو أنت بتزووم عليا ليه وأنت عارف إني مش مخرج ماتش الأهلي".
وأضاف: "ثالثا هو انت تعرف إيه عن الفار ولا هو أي هجص بيتقال وخلاص وناس كتير زامت عليا وظلمتنى لمجرد ان اسمي محمد نصر إللي بيكسب الأهلي البطولات وكان مافيش لعيبة ولا مدير فنى ولا إدارة ولا جمهور.. رابعًا كل الناس بما فيهم أنت لازم يعرفوا ان الفار هو المتحكم فى المخرج مش العكس لأن كل الكاميرات إللي عندى هي نفسها عند الفار إللي بيراجعها كلها ويستدعى الحكم ويدى قرار".
وأكمل: "خامسا ممنوع منعا باتًا ان بعد قرار الفار انك تعيد إي إعادة غير إللي راجعها الفار فقط.. سادسا علشان لعبة نيدفيد وناصر إللي ممكن ترقى لطرد مباشر ممنوع إعادة أي لعبة لم يتخذ الحكم أو الفار فيها قرار وده من لجنة الحكام علشان الجمهور مايثورش على الحكم وده كلامهم واعتقد لازم اللجنة تراجع نفسها فى التعليمات دي لأن لازم يكون فيه إعادة علشان تزيل أي شك ومحدش يظلم المخرج".
وواصل: "سابعا أنا مش ساحر هوقف الكرة على إيد اللاعب أو أجيب زاويا معينة تلغى هدف أو ضربة جزاء أو العب بالكاميرات جلا جلا ده كلام مش صح .. وأخيرًا مش عيب ان الانسان يغلط ويعتذر زى ما أنا عملت مع جمهور الزمالك رغم ان الفار وتعليماته هو الاساس مش المخرج وممكن ااقول تصريح فى لحظة انفعال من شخص مستفز وده حصل واستغفرت ربنا عليه وحجيت وربنا سامحنى لأن شغلنا للجمهور مش لنفسنا مافيش انتماء فيه.. أنا أهلاوي واعتز باهلاويتى وحبى للاتحاد أيضًا لكن بره شغلي لأني لما أعمل شغل محايد على الجميع الكل هيحترمنى وده الأهم مع مراعاة ضميرك ومراعاة المولى وعدم ظلم أي فريق كبير أو صغير لأن العمر قصير.. دى فرصة اشرح للناس ويفهموا قصة الفار مع ان لجنة الحكام كابتن وجيه وكابتن فاروق المفروض تطلع ببيان تقول للناس تعليماتها إيه للمخرجين ويشرحوا دور الفار ودور المخرج علشان الناس ترتاح ويبقى الاحترام بينا هو الأساس".
