وجه مصطفى يونس، نجم النادى الأهلى السابق، رسائل لـ مجلس إدارة النادى الأهلى برئاسة محمود الخطيب، وجمهور المارد الأحمر فى أعقاب أزمته الأخيرة مع النادى.اضافة اعلان
وكانت جهات التحقيق بالنزهة قررت إخلاء سبيل مصطفى يونس فى بلاغ محمود الخطيب ومجلس إدارة النادى بسبب تصريحاته المسيئة بضمان محل إقامته.
وقال مصطفى يونس فى فيديو بثه عبر قناته الرسمية على يوتيوب: «إلى شعب مصر العظيم وجمهور النادى الأهلى اللى صنع تاريخ مصطفى يونس، أنا الحقيقة بقالى كتير قوى ما بتكلمش والتزمت بكل حاجة اتقالتلى، وبعدين بيطلع كلام باسمى لم ولن يحدث فى أى وقت من الأوقات».
وأضاف: «أنا عمرى ما هبقى زملكاوى لإنى عاشق لتراب النادى الأهلى، وهناك ناس بتسيء ليا على أساس أن أنا فى خلاف مع النادى الأهلى، ولكن القلعة الحمراء دى حياتى، وإذا كان هناك خلاف فالخلاف ما بين اخوات والخطيب بالنسبة لى أخ، وكل الاخوات والأهل بيتخانقو أو بيزعلو، ده شيء طبيعى، ولكن يبقى الخطيب فى القلب».
وتابع: «الخطيب بالنسبة لى مش زميل، ولكن ده أخويا وهو فى القلب، وأى حد بيحاول يوقع بينا مش هيعرف، لإنى مقدرش استغنى عنه».
وأوضح: «يوم ما الخطيب قال إنه عيان فى المستشفى أنا فضلت أبكى كإن أبويا وأمى ماتوا مع بعض»، مشيرًا إلى أن الخطيب أخذ عزاء والدته عندما كان يونس فى مهمة بـ السودان.
وأكد مصطفى يونس: «اللى بيشكك فى أهلاويتى، أنا دايمًا بقول إن اتنين بيفرحونى فى مصر وهما الأهلى ومحمد صلاح».
ونوه بأنه يكن كل الاحترام والتقدير لـ مجلس إدارة النادى الأهلى، مضيفًا: «شيء طبيعى إنى أزعل لما أكون بعيد عن بيتى، لكن يبقى الحب والعشق للأهلى والخطيب وكل ما ينتمى لهذه المؤسسة العظيمة».
وواصل: «مجلس إدارة الأهلى عامل أرقام غير طبيعية فى عدد البطولات خلال الفترة الأخيرة، وبعدين عندنا 4 أندية من فروع النادى الأهلى، مفيش نادى فى مصر عنده ده».
وتحدث مصطفى يونس عن حبه لـ الأهلى، وقال: «بحبه زى ابنى، وإذا كنت بنتقد فأنا لا أقصد الإهانة أو الإساءة، ولكنى عشان عايزه يكون أحسن نادى فى الدنيا، وهو المتنفس للشعب المصرى، ولما بيكسب بيكون الشعب فى حالة روقان».
واختتم نجم الأهلى السابق تصريحاته قائلًا: «الناس بتاخد كلامى وبتحرفه، زى اللى بيكتبو ويقولو إنى زملكاوى، وهكتب قصة حياتى عشان الناس تعرف العلاقة بينى وبين الخطيب».
