كشف الناقد الرياضي إبراهيم المنيسي، مفاجآت بشأن رحيل رمضان صبحي، عن صفوف الفريق الأول لكرة القدم بالنادي الأهلي.
وقال إبراهيم المنيسي، خلال حواره ببرنامج «اللعيب»، المذاع عبر فضائية «إم بي سي مصر»: «النادي الأهلي كان بيبني مشروع كورة كويس العمود الفقري بتاعه رمضان صبحي، المشروع كان ماشي إن رمضان صبحي، هيبقى كابتن الفريق والنجم البارز فيه، لأنه لاعب موهوب وابن النادي».
اضافة اعلان
وأضاف: «رمضان صبحي، هو المشروع اللي كان بيجهزه الأهلي، عشان كده النادي الأهلي دفع كتير للنادي الإنجليزي لاستعارة رمضان رمضان»، مضيفًا: «رمضان صبحي، تعرض للإصابة مع المنتخب الأولمبي والنادي الأهلي هو اللي عالجه وسدد باقي مبلغ الاستعارة للنادي الإنجليزي وده اللي النادي الإنجليزي احترم فيه الأهلي وسهلت المفاوضات لشراء رمضان».
وأشار: «في واحد مش عايز اقول اسمه كشف لي سر قبل افتتاح استاد السلام، لما كان حاطط صور كل النجوم وكان بيتوسطهم رمضان صبحي، الأهلي كان عنده يقين إن رمضان صبحي. مكمل، لأن الكابتن الخطيب، استقبله وقدم له عرض كويس واللاعب وافق عليه، وبدأ أمير توفيق التفاوض مع النادي الإنجليزي على مبلغ الشراء لحد ما تم الاتفاق عليه».
وأكمل: «أمير توفيق، تواصل مع رمضان صبحي قال (مبروك احنا جبنا الاوكيه)، رمضان قاله (أوكيه إيه)، قاله خلاص وافقوا، رمضان قال (وافقوا ازاي، استناني أنا عندي عرض تاني».
وواصل: «قبلها بيوم أحد نجوم الكرة السابقين، اللي كان ليهم دور في منظومة الكرة بالنادي الأهلي قالي شخصيًا (لما روحت بالصدفة استاد السلام، لاقيت صورة رمضان صبحي وفي نفس اليوم مسؤول إداري في نادي بيراميدز بيكلمني يستشيرني في أمور قانونية، أنا افتكرت هيجيبوا لاعب أجنبي من الزمالك ولكن قالي هيجيبوا رمضان صبحي».
وتابع: «نجم الكرة الأهلاوي، قاله (رمضان مكمل في الأهلي أنا بالصدفة طالع من ملعب السلام، شايف صورته منورة قاله (احنا مخلصين معاه من الأسبوع اللي فات والفلوس اتحولت)».
واسترسل: «نجم الأهلي السآبق قالي (أنا اتصدمت يعني الأهلي هيعلن افتتاح استاد السلام وصورة رمضان صبحي، في الاستاد وسط الفرقة والراجل ماضي في نادي تاني أنا من الصدمة قعدت على ركبي في جنينة البيت لذلك من الأمانة قررت إبلاغ مسؤولي الأهلي)».
وواصل: «عشان كده محمود الخطيب، أكتر حاجتين زعل منهم انه قدر رمضان صبحي، واستقبله في بيته وقدمله أفضل عرض والنادي غرم فلوس كتيرة جدًا عشان يجي»
وأوضح: «لما أمير توفيق، كلم الخطيب وقاله (النادي الإنجليزي وافق على العرض ولكن رمضان صبحي، قالي استنى أنا عندي عرض تاني)، الخطيب قاله (قوله قدامك ساعتين)، لأنه كان عنده المعلومة بأن رمضان، أنهى كل شيء مع بيراميدز، وقرر منحة مهلة ساعتين فقط، عشان يلحق يشيل الصور من استاد السلام لو اللاعب قرر الانضمام لبيراميدز».
وأتم: «عشان كده الخطيب، قال أنا زعلان عليهم مش زعلان منهم، أنا قدمتلك كل حاجة مينفعش تنتهي بالشكل ده».
