كشف الإعلامي أحمد شوبير حارس مرمى الأهلي ومنتخب مصر السابق عن مفاجأة من العيار الثقيل قد تشعل أزمة مستحقات البرتغالي روي فيتوريا المدير الفني السابق لمنتخب مصر مع اتحاد الكرة.
اضافة اعلان
وقال أحمد شوبير: «فاكرين تصريحات الشرط الجزائي بتاع روي فيتوريا أنا قلت لكم إن إحنا هندفع هندفع، فبدل ما نلبس في العقد بالكامل كنا ندفع وخلاص، إمبارح وليد العطار المدير التنفيذي لاتحاد الكرة قال في تصريحات تليفزيونية إن فيتوريا له 3 شهور ولن ندخل في مشكلات مع فيتوريا وستحل المشكلة وديا».
وتابع شوبير: «ساعتها اتحاد الكرة قال هنبعت العقد لوزارة الشباب والرياضة لدراسته وبعدها نقرر هو لسة فيه دراسة يا جماعة على فكرة من السلبيات الكبيرة داخل اتحاد الكرة المصري إن أي لاعب أو مدرب له فلوس مبيعرفش ياخدها ويواجه عذاب ما بعده عذاب عشان يحصل على حقوقه».
وأضاف شوبير: «ده في العشوائية اللي عندنا إنما في إنجلترا بيخصموا من الأندية نقاط بسبب المستحقات فالكل منضبط».
وأوضح شوبير: «فيتوريا أنت اتفقت معاه وخلصت كل حاجة وقولت هنبعت كل 3 شهور 200 ألف دولار دلوقتي بيقول لك فاتت الـ 3 شهور ومفيش حاجة جت فالراجل قال لك اديني الفلوس وعايز حقي».
وحذر شوبير من سيناريو قادم مضيفًا: «ربنا يستر وفيتوريا ما يخدش الاتجاه الجديد ويقول لك أنا عايز الـ 600 الف دولار ابعتهم كلهم مرة واحدة ووقتها هتقول له حاضر بدون كلام عشان ما يروحش الفيفا ووقتها ممكن ندفعهم 6 ملايين دولار».
واختتم شوبير: «طب ليه ما كنا بكرامتنا وده ينفع يا جماعة نفضل نشتغل بالأسلوب القديم ده اللي مش بيقدم خالص».
