كشف إبراهيم بسيسو، وكيل أعمال الأردنى عودة الفاخورى، المتنقل حديثاً إلى بيراميدز، مفاجأة بشأن رفض عرض الأهلى لضم اللاعب، رغم كونه أعلى ماليا من عرض النادى السماوى. اضافة اعلان
وقال إبراهيم بسيسو فى تصريحات عبر قناة "أون سبورت«: »الأهلى دخل فى مفاوضات لضم الفاخورى معايا فى الأول عن طريق كابتن أسامة هلال، وبعدين الملف اتنقل لكابتن سيد عبد الحفيظ".
وأضاف: "التواصل مع كابتن أسامة كان مجرد جس نبض واستفسار ومختصر جداً، لكن الحصة الأكبر من الأحداث كانت بعد ما الملف انتقل لكابتن سيد عبد الحفيظ، الذى تواصل معايا بشكل شخصى، وبعدين وصلته إنه يتواصل مع النادى فى الأردن (نادى الحسين إربد)".
وتابع: "كابتن سيد سافر للأردن وعمل اجتماعات مع النادى، وأنا مكنتش طرف فى الاجتماع ده. طريقة التفاوض كانت مختلفة نوعاً ما مع النادى الأهلي؛ الأندية التانية زى بيراميدز كان التواصل معانا مباشر وبنتفاوض بشكل منفصل (ما يخص النادى وما يخص اللاعب)".
وأردف: «فى ملف الأهلى، لما كابتن سيد زار الأردن، رئيس نادى الحسين إربد وصلت له فكرة إنه هو اللى هيفاوض عن عودة وعن النادى، كنوع من الشعور الأبوى تجاه عودة الفاخوري».
وأوضح: "كان فيه اتصال ما بينى وبين كابتن سيد عبد الحفيظ قبل زيارته للأردن وبعد زيارته للأردن، وحصل بعد ما تشاورت مع عودة ووالده طرحت جميع الأفكار، يعنى المزايا أو الأمور اللى بتناسب عودة للنادى الأهلى وطبعاً اللى هياخده هيديه مع النادى الأهلى، فكانت فكرة محمسة طبعاً بكل تأكيد، النادى الأهلى نادى وفكرة محمسة جداً لأى لاعب".
وأضاف: "النادى الأهلى عرض مبلغ أكبر لنادى الحسين إربد وعرض مبلغ أكبر لعودة، حتى نادى الرياض السعودى كمان عرض مبلغ أكبر من الطرفين، وفيه عروض كانت أقل من نادى بيراميدز، فنادى بيراميدز تالت أعلى نادى ترتيباً من ناحية مجموع الصفقة اللى هو المقدم للنادى والمقدم للاعب".
وواصل: "ما كانش من الأساس المعايير اللى إحنا حاولنا نتبعها إنها مرتكزة على الجانب المادى، الفكرة فى الموضوع اللاعب بيمر فى مرحلة فى مسيرته معينة، وفيه بعض الأندية كمان بتمر فى مراحل يعنى إحلال وتجديد أو مراحل صعود أو استقرار، وفرصة المشاركة كانت واحدة من الأساسيات اللى ركزنا عليها خصيصاً بسبب كأس العالم".
واختتم: «فرصة المشاركة أكيد كانت عنصر أساسى فى طريقة تفكيرنا، الجانب المادى ما كان الأولوية، أكيد جانب مهم ومدى تطور اللاعب ومساحة التطور، وفرص الوصول إلى ما هو أبعد - إحنا بنتكلم عن الدوريات الأوروبية - فنحن وجدنا فى الفترة الحالية فى هذا الموسم فى هذا التوقيت إن جميع المعايير اللى كنا بنتطلع عليها وصلتنا لنادى بيراميدز».
