وجه الإعلامى أحمد شوبير، رسائل قوية إلى إمام عاشور، لاعب الفريق الكروى الأول بالنادى الأهلى، بعد التصريحات التى أدلى بها اللاعب صالح جمعة، بشأن تواجد الثنائى فى إحدى السهرات سويا.اضافة اعلان
وقال أحمد شوبير فى تصريحات عبر برنامج «الناظر» على «قناة النهار» :"إمبارح كنا إمام بوادر أزمة وهى التصريحات اللى خرجت بتتهم إمام بالسهر، أنا هنا بصدق اللعيب، أنا ما بحبش قولاً عن، أنا بحب قولاً من".
وأضاف: «فلما طلع إمام وقال هذه التصريحات لا أساس لها من الصحة فأنا مصدقه لأنى عايز أصدقه، فعايز بقى هنا أقول لإمام قدام مصر كلها».
وتابع: «بص يا إمام، لو إنت بتلعب فى نادى درجة رابعة مش فى النادى الأهلى (الأعظم فى مصر وفى أفريقيا وفى العالم العربى وواحد من أعظم أندية العالم)، لو بتلعب فى أى نادى لازم تخلى بالك من نفسك ومن مستقبلك».
وواصل: «لو إنت شايف إنك مبسوط فى النادى الأهلى والدنيا تمام عندك، عندك سنتين فى عقدك كملهم وقرر مصيرك بعد كدة».
وأدرف: «ولو إنت شايف إنه كأس العالم ميستاهلش إنك تبقى منضبط وملتزم بشكل واضح عشان مستقبلك. إنت رايح على كأس عالم، بعد حوالى أربع شهور».
وأضاف: «لو شايف انها مش مهمة بالنسبة ليك تعلن من دلوقتى لو شايف إن الحاجات دى مع وجودك فى النادى الأهلى اللى زوّد من نجوميتك بصورة إنت شايفها، يبقى لازم تضحى. مش تضحى، لازم تلتزم، لأنه ده لمصلحتك إنت».
وواصل: «المرحلة دى بتصب فى مصلحتك إنت؛ لو عندك عرض أوروبى وعرض جيد، على فكرة النادى الأهلى مش هيقف قدام مستقبلك، أنا بقولك كلام على مسؤوليتى الشخصية».
وشدد: «الأهلى بدونك أهو لعب وأهو تأهل وعدى أهم ماتشين دون خسارة (التعادل فى تنزانيا 1-1 والتعادل فى شبيبة القبائل وضمان الصعود)، فالأهلى معندوش مشكلة خالص، المشكلة عندك إنت يا إمام».
وأضاف: «اسمع كلام اعتبرنى هنا بقى والدك، إنت زيك زى مصطفى وزيك زى أودى، لازم تقعد فى بيئة صالحة عشان الناس تفضل تقول إمام أحسن لعيب فى مصر».
واختتم: «اقعد راجع حساباتك من البدايات خالص، شوف إنت إيه الأخطاء اللى عندك واقعد مع البيئة الصالحة الطيبة اللى تساعدك، إنت اللى هتخسر. اختار أصحابك، دايماً يقولك اختار الصديق قبل الطريق، فالقصة عندك إنت، فى ملعبك إنت».
