معلومة إن كيروش جاي مدير فني للاتحاد، هزت ابو ريدة، والموضوع مكانش كاف نفيه عن طريق مصدر مسؤول، وخلى أبو ريدة يطلع الأمين العام مصطفى عزام ينفي الموضوع بشكل رسمي.
اضافة اعلان
طبعًا الأسباب معروفة، وهي ان حسام حسن أول ما بيسمع سيرة كيروش، بيتحسس الكرسي اللي هو قاعد عليه، لأن النوايا واضحة من بدري، وبالتالي مش هنضحك على بعض، وأهي الأيام مفيش أقرب منها.
تعالى بقى للسؤال الأهم، هو احنا عايزين مدير فني أجنبي للاتحاد ليه؟!، ويعمل ايه؟!، احنا هندفع 220 الف دولار مقابل إيه؟! علشان تجاوب على سؤال زي كده، لازم متحطش نفسك في معزل عن التجارب الناجحة اللي في محيطك، واللي مش محتاجة اي مجهود لما نشاور عليها ونقول التجربة المغربية.
هل المغرب استعانت بمدير فني اجنبي للجامعة المغربية علشان يخطط لها؟! الإجابة، قطعا لا، هي عندها كادر إداري مخضرم، واع، فاهم، محب لبلده وبيقدم مصلحتها على مصلحته الشخصية، اسمه فوزي لقجع، قدر من خلال مكانته في الفيفا في السنين اللي فاتت، انه يفيد بلده، ويوسع نفوذه في كاف، ويفرض كوادر مغربية، لا وكمان تقليص سلطات ونفوذ اي كوادر لبلد تانية، وقدر على حد علمي انه يصنع كوادر مغربية تقدر تقود المغرب اداريا في كرة القدم.
طيب يا جماعة، احنا عندنا برضو المفروض هاني ابو ريدة، ما هو عضو قديم ومتمرس في فيفا وكاف، ليه يلجأ ويخلي مصر تلجأ لتكلفة 220 الف دولار شهريا علشان حد يخطط لنا، يعني هو ليه ميغيرش مثلا من إمكانيات لقجع اللي المفروض يكون احسن منه مثلا؟!
الغريب هنا، انك لو جيت تبص على ابو ريدة، عمل مين او ساعد مين في الفيفا او الكاف، هتلاقي هو واحد بس، دراعه اليمين ومن يدين له بالولاء، وهو احمد مجاهد، لكنه في الاخر برضو مش كادر مهم لا هنا ولا هنا، ولكن هو مرتبط وجوده بوجود ابو ريدة نفسه!
علشان كده، بقول للسادة المسؤولين عن الرياضة في مصر، وفروا فلوسكم، الموضوع محتاج بس إخلاص ودراسة اكتر من استيراد ناس مشطبة شغف، هاتوا كوادر مصرية حقيقية، تقدر تشتغل، حتى لو استنسخنا تجارب حوالينا مش عيب، يا اخي دي بحسبة بسيطة الأردن راحت جابت مدرب مغربي صنعت تاريخ ليها.
كل اللي عملته المغرب مش كيميا، طبقت العلم والعدل، اهتمت بقطاع الناشئين والفئات العمرية في كل المنتخبات، دورت على اللاعيبة اللي من جنسيتها والمنتشرين في كل بلاد العالم.
وهنا هسألك سؤال، هو فيه اكتر من المصريين في كل حتة في العالم؟!، طيب أنا لو دفعت ال220 الف دولار شهريا في البحث واستقدام مجموعات من دول مش هطلعلي بكام لاعب على مدار سنتين تلاتة، وهنا مبقولكش مشروع قومي ولا رؤية 2038.
هتيجي تقولي ايه فايدة خطوة زي دي، اقولك بسبب التخلف وقلب قطاع الناشئين لاستثماري، مبقاش فيه ناشئين، انما عدد كبير من ولادنا اللي بره متأسسين صح في المراحل دي، وبالتالي اهي نواة تسند لحد ما تعدل أمورنا.
أه نسيت أقولك، تقدر تسأل الجامعة المغربية عملت إيه في كام سنة فاتت علشان تقنع لعيبة تمثل منتخب المغرب ليها شأن كبير، وأنت عملت إيه، وأقرب مثال لو دورت على ملف استقدام هيثم حسن هتلاقي فضايح !، لكن محدش بيدور ولا بيحاسب.
بمناسبة رؤية 2038، حد يقدر يقولي ازاي نثق ان الناس الموجودة دي بتعمل مشروع قومي على مدار 12 سنة لنهضة الكورة في مصر، وهما اساسا السبب في ان احنا فقدنا الريادة، وهما السبب في ان احنا محتاجين 12 سنة علشان ننهض، طيب ما كان الاولى ان اللي اخرونا 12 سنة يخلونا سابقين بخمسين سنة.
لو الناس دي هي اللي حطت خطة رؤية 2038، دي مش هتبقى رؤية دي هتبقى كفيفة 2038 وهنحتاج 50 سنة علشان تدب فينا الروح بعد ما بقينا جثة اساسا.
اسف لو طولت عليكم .. لكن ما تنساش اني قلتلك قهوتك وتعالى عايزك في كلمتين.
