شن الإعلامي
أحمد شوبير حارس مرمى الأهلي ومنتخب مصر السابق هجوما عنيفا على لاعبي الأهلي عقب
الخسارة أمام صن داونز بطل جنوب أفريقيا في بطولة دوري أبطال أفريقيا.
اضافة اعلان
وقال أحمد شوبير
في تصريحات إذاعية: «مفيش لاعب واحد ظهر في الأهلي قدام صن داونز بشكل جيد، يمكن
شوية بيرسي تاو ومحمد شريف وأفشة لما نزل كان بيجري شوية لكن تقولي أصل لعبنا
الساعة 3 العصر وده وقت صعب، كل دي حجج واهية، لإن البطل بيلعب في أي وقت، ولعبنا
كذا مرة في الوقت ده مش غير أي مشكلة».
وتابع أحمد
شوبير: «التحكيم كان مميز جدا والأهلي لم يستحق أي ركلة جزاء كما يتصور البعض
والملعب كان ممتاز ومن أحسن ملاعب أفريقيا والأهلي على طول بيلعب وسط حضور جماهيري
كبير للمنافسين ولا يهمه يعملوا حفلة قبل الماتش أو يعملوا اللي هم عايزينه المهم
الأهلي يلعب».
واستنكر شوبير
شكل الأهلي خلال المباراة وقال: «الاستحواذ وصل لـ 80 % لفريق صنداونز و20 %
للأهلي، ودي محصلتش، لدرجة إن الأهلي ماكانش عارف يبني هجمة في الوقت اللي المنافس
بيلعب عمياني حافظين بعض، وللعلم صن داونز دي أقوى فرقة في إفريقيا بلا منافس».
وأضاف شوبير:
الشوط الأول انتهى بتقدم صن داونز بثلاثية، وما فيش فيهم ركلة جزاء ولا كورة ثابتة
كلها أهداف ملعوبة وتسديدات قوية من خارج منطقة الجزاء، انا مش متخيل أيه المنظر
ده مش عارفين نباصي 4 نقلات على بعض، كان شكل مهين للجميع، بقيت قاعد نفسي الحكم
يصفر من الخوف، لما النتيجة وصلت 3\2 قولت الحمد لله يارب تخلص كدا معانا خسرانين
بس أحسن ما النتيجة تخرج بشكل أكبر، لأننا مش عارفين ولا نقفل اللعب ولا نفتحه،
ومن هنا أنا مش فاهم، هل الدوري بتاعنا ضعيف ولا احنا اللي سيئيين ولا فيه إيه
بالضبط«.
وأضاف شوبير:
«الأهلي مفيش قدامه غير أنه يكسب الماتشين الجايين قدام القطن والهلال السوداني
ونستنى بقى بس مش هايحصل إن الهلال هيتعادل أو يخسر من صن داونز، أنسى، وانا قولت
من بدري أندية القارة كلها عاوزة الأهلي يخرج من بدري، وأنا بقول الهلال هيكسب صن
داونز ويتأهلا الثنائي وهو وصل خلاص».
