كشف وائل جمعة، نجم الأهلي منتخب مصر الأسبق، كواليس مثيرة بشأن انتقاله للقلعة الحمراء ورفضه الانضمام لنادي الزمالك.
وقال وائل جمعة، خلال بودكاست «بي إن سبورتس»: «عقب مباراة الأهلي وغزل المحلة في الدوري عام 2001، والتي كانت في استاد القاهرة، الكابتن حلمي طولان، بعتلي عربية وروحت بيته لتوقيع عقد مع الزمالك».
اضافة اعلان
وأضاف: «الساعة كانت 2 ونصف بليل ومكنش في عقد مع حلمي طولان، ونادي الزمالك كان قفل. حلمي طولان، تواصل مع المستشار مرتضى منصور، كان وقتها نائب رئيس الزمالك لإبلاغه بما حدث»
وتابع: «مرتضى منصور، طلب من حلمي طولان، أن يوقع معي عقد اتفاق في ورقة بيضة، لحين إحضار العقود الرسمية تاني يوم، ووقعت بالفعل على الورقة ومشيت»
وواصل: «نزلت من بيت حلمي طولان، لاقيت محمد عبدالوهاب، عضو مجلس إدارة الأهلي وعدلي القيعي، بيكلموني للتوقيع للأهلي، أبلغتهم بموافقتي على الانتقال للأهلي وحكيت ما حدث مع الزمالك، وأرسلت لهم نسخة من الورقة».
وأكمل: «كان متواجد في تلك الجلسة الكابتن الخطيب وأسامة قنديل، المستشار القانوني للأهلي، واطلع على الورقة، بعدها الكابتن الخطيب، كلمني وقالي (احنا عايزينك، عندك استعداد تيجي الأهلي)، قولتله: طبعًا عندي استعداد».
وتابع: «الخطيب، بعدها قالي (اختفي واقفل تليفونك ومتردش على حد، واحنا هنعرف نجيبك)»، مضيفًا: «الأهلي بعت عربية خدتني من البلد لمكتب محمد عبدالوهاب، وقعت العقد معاه وبعدها انضميت لمعسكر المنتخب العسكري».
وأردف: «المستشار مرتضى، علم بتوقيعي للأهلي، ومكنش عارف يجبني، اتصل على تليفون لعيبة الزمالك في المنتخب وفتحوا التليفون وأنا مردتش ارد وقولتلهم مش عايز اكلمه، اللعيبة جابت التليفون في الأوضة وكنت سامع الشتايم وقالي (أنا هعمل فيك وأنا هسجنك وهوديك ورا الشمس وابقى خلي الأهلي ينفعك)، سمعت كل اللي يخطر في بالك، وأنا قولت للعيبة الزمالك مش هرد عليه».
وأتم: «الموضوع انتهى وانتقلت للنادي الأهلي، وبعدها بشهرين أو تلاتة قابلت المستشار مرتضى، في فرح سلم عليا، والمشكلة انتهت».
