مشادة بين دويدار وثنائي الأهلي السابق بسبب إمام عاشور (فيديو)

نشبت مشادة كلامية على الهواء بين ثنائي الأهلي السابق، أسامة حسني وشريف حازم، مع أحمد دويدار، نجم الزمالك السابق، بسبب الحديث بشأن مطالب إمام عاشور، لاعب الأحمر، تعديل عقده أولًا قبل التمديد، واتخاذ النادي قرارًا بتأجيل المفاوضات.اضافة اعلان

وقال أحمد دويدار عبر قناة «إم بي سي مصر 1»: «دلوقتي أنت تعرف تجيب أخبار من النادي الأهلي، كام مرة أنت اتكلمت في تعديل إمام عاشور».

ليرد أسامة حسني: «عقد إمام عاشور لسة فاضل 3 سنين فين المشكلة؟!»، ليجيب دويدار: «إمام عاشور بيطلب تعديل عقده، ده مكانش بيحصل في النادي الأهلي».

وعلق شريف حازم، قائلًا: «هو إمام عاشور ميستاهلش يكون أكثر لاعب بياخد فلوس في مصر، عندك شك في ده؟»، ليكمل أسامة حسني: «هل عندك شك إن الأهلي بيقدر لاعيبته كويس، فين الموضوع أصلًا، وعقده لسة كمان 3 سنين، وبشوف لاعيبه بيبقى فاضلها 5 و6 شهور عشان تجدد».

وأكمل شريف حازم: «لما زيزو كان مكسر الدنيا في الزمالك، وكل سنة بياخد فلوس بعيد عن العقد وكان يستاهل، إمام عاشور أحسن لاعب في مصر ومينفعش لاعب في مصر ياخد فلوس أكثر منه».
وزاد شريف حازم: «دلوقتي دويدار بيتكلم عن الإدارة والشغل الإداري، لما زيزو مشي مقولتش أي حاجة، وعمال تعقب على الأهلي، وأنا أقدر أبيع إمام بـ 100 مليون لو عايز أو زيزو».

وتابع: «أنت الراجل بتاعك (زيزو) مشي مخدتش حتى 5 جنيه، أنت بتقول غلط، يبقى متعقبش بقى».

فيما رد دويدار: «أنا غيرك، أنا قولت غلط، أنا أقول الغلط غلط والصح صح، لكن أنت في حاجات غلط بتبقى شايفها غلط في الأهلي، ومش بتتكلم فيها، لكن أنا بتكلم فيها».

ورد مجددًا أسامة حسني، قائلًا: «كابتن دويدار عايز يبروز مشكلة ومفيش مشكلة، والأولى إني أجدد لـ إمام اللي لسة عقده معايا 3 سنين، وسايب حسام عبدالمجيد؟!».