فتح الإعلامي مدحت شلبي، النار على سيد عبد الحفيظ، عضو مجلس إدارة النادي الأهلي، بسبب تواجده في جلسة استماع محادثات الفار في مباراة الأهلي وسيراميكا كليوباترا.اضافة اعلان
وقال مدحت شلبي، في تصريحات تلفزيونية عبر فضائية «إم بي سي مصر2»: «كلمتين لسيد عبد الحفيظ، أنا قولت الأسبوع اللي فات سابقة جديدة لعضو مجلس إدارة ينزل من المقصورة لأرض الملعب عشان يروح للحكم.. وفقًا لشهود العيان سيد عبد الحفيظ، مد ايده عشان يسلم على الحكم ولكن الحكم مرديش يسلم عليه حتى لا يتعرض للانتقادات».
وأضاف: «هل عضو مجلس إدارة النادي الأهلي يمد ايده ومحدش يسلم عليه !».
وتابع: «ثم يقود مجموعة ويروح اتحاد الكرة عشان يشوف الفار، اتحاد الكرة قال اللي يجي يبقى ليه صفة فنية زي وليد صلاح الدين وعادل مصطفى، ما دول بيفهموا برضه وكانوا لعيبة كبار ياكابتن، بصرف النظر هما هيسمعوا إيه، هما مش هيسمعوا أم كلثوم هيسمعوا ببساطة شديدة الحوار بين محمود عاشور حكم الفار ومحمود وفا، حكم المباراة، اكيد كانوا بيتكلموا في عرض زاوية لقطة ضربة الجزاء».
وواصل: «مفيش حوار تاني هتسمع إيه؟ الكابتن محمود وفا عمره ما يقوله أنا مش هحسب ضربة الجزاء نكاية في الأهلي».
وأكمل: «إيه يا جماعة، هتسمع إيه؟ هتسمع ما يطلبه المستمعون! مش هتسمع حاجة والله ولكن إنت بتعمل أكشن عشان تعمل غبار على الأخطاء»
وأردف: «إنت عارف إنك مش هتسمع الفار لأن اتحاد الكرة أكد أن من سيحضر من تواجد في الاسكور شيت، انت رايح عشان تزود الغبارعلى الأخطاء».
وأكمل: «ماذا لو جيت حضرتك تدخل رجال الأمن حطوا إيدهم على صدرك وإنت عضو مجلس إدارة الأهلي ؟ والموظفين اللي معاك مسكوا في رجال الأمن وقامت خناقة واتصورت فيديو واتصدرت للناس بقت فتنة ياكابتن سيد».
وأوضح: «اللي أنا بقوله وارد جدًا، لولا أن الأمن تحلى بأقصى درجات الصبر والسلوك الصحيح كان ممكن جدًا تفتعل أزمة، جمهور الأهلي لو شاف خناقة رد فعلهم هيبقى إيه في المدرجات؟ الرد هيبقى ايه ياكابتن سيد؟».
وأتم: «الوفد ده كله طالع بتعليمات مين؟ هل طالع بتعليمات كابتن سيد، ولا ياسين منصور، باعتباره المسؤول عن ملف الكرة؟ ولا طالع بتعليمات الكابتن الخطيب؟».
