تصريحات نارية من شوبير بشأن اجتماع مجلس الأهلي

كشف الإعلامى أحمد شوبير حارس مرمى الأهلى ومنتخب مصر السابق كواليس ما حدث فى اجتماع مجلس إدارة النادى الأهلى الذى كان مقررا أمس الأربعاء بمقر القلعة الحمراء فى الجزيرة.اضافة اعلان

وقال أحمد شوبير فى تصريحات إذاعية اليوم الخميس: «موضوع الأهلى واتحاد الكرة وأزمة ماتش سيراميكا وضربة الجزاء والاجتماعات والبيانات، أنا قولت الأهلى عنده اجتماع مجلس إدارة هشوف يعملوا إيه وأقول لكم ونفس الأمر بالنسبة لاجتماع اتحاد الكرة المقرر يوم الجمعة المقبل هشوف هيحصل إيه وأطلع اعلق على القرارات».

وأوضح شوبير: «مفيش حد فى مصر مكانش عارف إن فيه مجلس إدارة للنادى الأهلى إمبارح، وبالفعل توافد أعضاء المجلس على النادى باستثناء الكابتن محمود الخطيب، وفى الآخر قال لك دى جلسة ودية ومفيش قرارات والأهلى مش هيطلع قرارات عنترية، وده كلام عاقل الحقيقة يعني».


وتابع شوبير: «واللى بيقولوا الأهلى يروح المحكمة الرياضية، أنا إمبارح قولت لك يعنى إيه اللجوء للمحكمة الرياضية هيروح يقول لهم إيه؟، هيقول لهم كانت لى ضربة جزاء، ومتحسبتش هيقولوا له إحنا مالنا، هيقول لهم السنة اللى فاتت كنا عايزين حكام أجانب ومجبوش برضه هيقولوا له إحنا مالنا؟!».

وأضاف شوبير: «اللجوء للمحكمة الرياضية مش فى أى حاجة، ما بيراميدز لجأ وقال عايز أخد الدورى ومعملش حاجة والأهلى حشد قواه القانونية وأثبت إن الدورى من حقه، فأنت هتروح المحكمة الرياضية هتقول إيه ملهاش لازمة يعني!».