الأهلى يستقر على بديل توروب

كشف الإعلامى أحمد شوبير عن ملامح المدرب الجديد للفريق الأول لكرة القدم بالنادى الأهلى، بعد فسخ التعاقد مع الدنماركى ييس توروب.

وقال شوبير، فى تصريحات إذاعية: «بعد رحيل توروب، الأهلى يستعد للتعاقد مع مدرب جديد، أنا شخصيا أتوقع كل الأسماء اللى بتتقال. أكتر واحد الأهلى متكلم معاه هو فان بوميل».اضافة اعلان

وأضاف: «فى مفاجأة، بس هقولها بعدين، مش هينفع دلوقتى لأن الدنيا كلها ممكن تبوظ، عادل مصطفى لَمّ اللبس ومشى، والأهلى قد يعلن اليوم الهيكلة الجديدة، أو فى بعض خطوط لسة لم تتشابك مع بعضها».


وتابع: «عادل مصطفى عمل كل حاجة بما يرضى الله، لكنها الفترة والدنيا مكنتش متظبطة، ولحد الآن المؤكد أن وائل جمعة مدير الكرة، لكن الجانب الفنى متدارى عليه».

وأوضح: «النادى الأهلى كان فى طريق للتعاقد مع المدرب المصرى حسام البدرى، لكن غضب الجماهير أنهى الأمر، الأهلى هيعلن خلال ساعات عن الهيكلة، الأهلى أتعور فعلا، بس تعويرة خفيفة».

واختتم: «النادى قفل على نفسه الفترة اللى فاتت، وعمل خطوة جيدة على الطريق لإنهاء الأزمات والبداية بشكل جيد. يتبقى من وجهة نظرى أمران، مفيش إعادة ما يمنع التجديد مع اللاعبين، يعنى انت لو عايز الشحات لازم يكون فى مرونة فى التعامل زى ما حصل مع توروب، عايز كوكا، عايز أفشة، هكذا لازم تظبط نفسك، والخطوة التانية هى الإعلان عن الهيكلة، وده خلص وهيحصل».