كشف أحمد مجدي لاعب الفريق الأول لكرة القدم بنادي الزمالك، عن كواليس رحيله عن القلعة البيضاء، بعد 14 سنة قضاها داخل النادي.
وسبق أن قررت إدارة نادي الزمالك، عدم تواجد الرباعي، أنس وائل وأيمن أمير عبد العزيز، وأحمد مجدي، وعبدالرحمن كمال، مع الفريق الأول، خلال الموسم الجديد.
اضافة اعلان
وكتب أحمد مجدي، عبر حسابه على موقع التواصل الإجتماعي "إنستجرام": "بقالي 14 سنة داخل نادي الزمالك، دخلت النادي وأنا صغير بعد ما روحت الاختبارات، وعملت أكتر من 10 اختبارات، في كل مرة كنت بروح وأنا عارف إن ممكن أمشي، لكن كنت واثق في ربنا، والحمد لله اتقبلت من غير أي واسطة".
وأضاف: "طول عمري في الكرة، لا كان ليا واسطة ولا اعتمدت على أي حد، غير توفيق ربنا ثم مجهودي، خلال الـ14 سنة لعبت في كل المراحل السنية، وتشرفت بتمثيل منتخب الشباب، واتصعدت للفريق الأول مع جوزيه جوميز".
وتابع: "لكن للأسف، قبل القيد بأيام قليلة، اتبلغت إني مش هكمل مع النادي، الموسم اللي فات، فجأة اتقال لي إن عندي مشكلة صحية ومحتاج أعمل أشعات، رغم إني عمري ما اشتكيت من أي حاجة، ولا حسيت بأي أعراض".
وواصل: "فضلت حوالي 6 شهور بعمل فحوصات وأشعات بسبب حاجة في الآخر طلعت مش موجودة أصلًا، وضاع عليا موسم كامل كنت مستنيه عشان أثبت نفسي مع الفريق الأول".
وأردف: "في النهاية، جبت تقرير من رئيس قسم القلب بجامعة القاهرة، وهو نفس الدكتور اللي النادي طلب مني أكشف عنده، وأكد أن حالتي سليمة تمامًا، ومفيش أي مانع من ممارسة كرة القدم".
واستكمل: "رغم كده، النادي رفض أكتر من عرض جالي من وقت تصعيدي للفريق الأول، وكان دايمًا الرد إن (إنت ابن النادي ومستقبل النادي)".
وأتم: "وطول فترة الإجازة كنت بتواصل مع النادي عشان أعرف موقفي، ولو مفيش نصيب كنت أشوف مستقبلي في مكان تاني قبل ما الأندية تقفل قوايمها، لكن في كل مرة كان الرد إني مستمر مع الفريق".
