علق إمام عاشور على أزمته مع النادي الأهلي، بعد تخلفه عن السفر إلى تنزانيا، وقرار النادي بتغريمه وإيقافه لمدة أسبوعين وتدريبه منفردًا.
وكتب إمام عاشور عبر حسابه على ستوري انستجرام:«للأسف كلام كتير مغلوط وغير صحيح بيتردد بخصوص اللي حصل، وأنا متقبل أي قرار ياخده النادي، وواثق أنه المسئولين في الأهلي هيتفهموا موقفي كويس».
اضافة اعلان
وتابع:«أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي، وباخد مضادات حيوية، وللأسف كل أسرتي بتعاني من نفس الأعراض"».
وأضاف:«وأنا بلغت الدكتور أحمد جاب الله بظروفي الصحية وعدم قدرتي على السفر، وده إجراء غير كافي في مثل هذه الأمور، لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر».
وواصل:«الموضوع اتقفل خلاص، وتواصلت امبارح بالليل مع الكابتن وليد صلاح الدين، وأنا تحت أمر النادي، وجمهور الأهلي سندي وضهري بعد ربنا سبحانه وتعالى».
واكمل:«وبعتذر للنادي والجهاز الفني وزمايلي وقبلهم جمهور الأهلي، أنا فخور باللعب في أكبر نادي في أفريقيا، وعلاقتي بجماهيره العظيمة لا تقبل القسمة على اتنين، وأرجو من الجميع إغلاق هذا الموضوع، والناس اللي بتقول ان إمام عايز يلوي دراع النادي بقولهم حسبي الله ونعم الوكيل».
وأكد:«محدش يقدر يلوي دراع الأهلي. ولا يمكن أفكر بالطريقة دي أبدا..وانا اتشرفت بارتداء الفائلة الحمراء وبقالي 3 سنين في النادي».
واختتم: «والحمد لله عمري ما قصرت لا في حق النادي ولا جماهيره. وده حقهم عليا. ووجودي في الآهلي نادي القرن وفي ضهري جمهور الاهلي يعوضني عن كل حاجة.. عندنا ماتش بكره مهم. يارب كل التوفيق لزمايلي والجهاز الفني ونحقق الفوز اللي يسعد كل الأهلاوية».
